ਮੱਧ ਪ੍ਰਦੇਸ਼,22-04-2023(ਪ੍ਰੈਸ ਕੀ ਤਾਕਤ)- ਮੱਧ ਪ੍ਰਦੇਸ਼ ਦੇ ਬਾਲਾਘਾਟ ਜ਼ਿਲ੍ਹੇ ’ਚ ਲੰਪੀ ਬਿਮਾਰੀ ਵੱਖ ਵੱਖ ਰੂਪ ਲੈ ਰਹੀ ਹੈ। 2022 ਦੇ ਮੁਕਾਬਲੇ 2023 ’ਚ ਜਿਹੜੇ ਪਸ਼ੂਆਂ ਨੂੰ ਲੰਪੀ ਲਾਗ ਹੋ ਰਿਹੈ ਹੈ, ਉਨ੍ਹਾਂ ਪਸ਼ੂਆਂ ’ਚ ਲੰਪੀ ਦੇ ਆਮ ਲੱਛਣਾਂ ਦੇ ਨਾਲ ਹੀ ਨਵੇਂ ਲੱਛਣ ਵੀ ਦੇਖਣ ਨੂੰ ਮਿਲ ਰਹੇ ਹਨ, ਜਿਸ ਨਾਲ ਇਹ ਬਿਮਾਰੀ ਪਸ਼ੂਆਂ ਲਈ ਪਹਿਲਾਂ ਦੇ ਮੁਕਾਬਲੇ ਹੋਰ ਖਤਰਨਾਕ ਸਾਬਿਤ ਹੁੰਦੀ ਜਾ ਰਹੀ ਹੈ। ਹੁਣ ਤਕ 300 ਤੋਂ ਵੱਧ ਪਸ਼ੂਆਂ ਦੀ ਮੌਤ ਬਾਲਾਘਾਟ ਜ਼ਿਲ੍ਹੇ ’ਚ ਹੋ ਚੁੱਕੀ ਹੈ। ਨਵੇਂ ਸਟਰੇਨ ਦੀ ਪਛਾਣ ਲਈ ਮਾਹਿਰਾਂ ਦੀ ਟੀਮ ਬਾਲਾਘਾਟ ਤੋਂ ਸੈਂਪਲ ਲੈ ਆਈ ਹੈ।
ਬਾਲਾਘਾਟ ਜ਼ਿਲ੍ਹੇ ’ਚ ਧਾਰਾ 144 ਲਾ ਕੇ ਬਲਦ ਬਾਜ਼ਾਰ, ਹਾਟ ਬਾਜ਼ਾਰ ਦੇ ਨਾਲ ਹੀ ਜਨਤਕ ਥਾਵਾਂ, ਬਾਜ਼ਾਰਾਂ ਵਿਚ ਪਸ਼ੂਆਂ ਨੂੰ ਲਿਜਾਣ ’ਤੇ ਪਾਬੰਦੀ ਲਾ ਦਿੱਤੀ ਗਈ ਹੈ। ਜ਼ਿਲ੍ਹੇ ’ਚ ਛੇ ਲੱਖ ਤੋਂ ਵੱਧ ਪਸ਼ੂ ਹਨ, ਜਿਨ੍ਹਾਂ ’ਤੇ ਲੰਪੀ ਬਿਮਾਰੀ ਦੇ ਨਵੇਂ ਵੇਰੀਐਂਟ ਦਾ ਖਤਰਾ ਹੈ
ਬਾਲਾਘਾਟ ’ਚ ਲੰਪੀ ਬਿਮਾਰੀ 2022 ’ਚ ਛੱਤੀਸਗੜ੍ਹ ਦੇ ਰਾਹੀਂ ਆਈ ਸੀ, ਲਾਂਜੀ ਖੇਤਰ ’ਚ ਸਭ ਤੋਂ ਵੱਧ ਪਸ਼ੂ ਬਿਮਾਰ ਹੋਏ ਸਨ। ਇਸ ਤੋਂ ਬਾਅਦ ਪੂਰੇ ਜ਼ਿਲ੍ਹੇ ’ਚ ਬਿਮਾਰੀ ਫੈਲੀ ਸੀ। ਇਸ ਦੌਰਾਨ ਤਿੰਨ ਪਸ਼ੂਆਂ ਦੀ ਮੌਤ ਹੋਈ ਸੀ। ਪਸ਼ੂਆਂ ’ਚ ਲੰਪੀ ਹੋਣ ’ਤੇ ਬੁਖਾਰ, ਖਾਣਾ ਪੀਣਾ ਬੰਦ, ਸਰੀਰ ’ਤੇ ਗੰਢਾਂ ਤੇ ਸੋਜ ਸੀ।
