ਮੈਨੀਟੋਬਾ ‘ਚ ਹੁਣ ਤੱਕ ਫਲੂ ਨਾਲ 15 ਮੌਤਾਂ, 1,100 ਤੋਂ ਵੱਧ ਫਲੂ ਦੇ ਮਾਮਲਿਆਂ ਦੀ ਪੁਸ਼ਟੀ

ਵਿਨੀਪੈਗ, 13 ਫਰਵਰੀ (ਪ੍ਰੈਸ ਕਿ ਤਾਕਤ ਇੰਟ ਬਿਊਰੋ) : -ਸੂਬੇ ਦੀ ਤਾਜ਼ਾ ਇਨਫਲੂਐਨਜ਼ਾ ਨਿਗਰਾਨੀ ਰਿਪੋਰਟ ਅਨੁਸਾਰ ਪਿਛਲੇ ਸਾਲ ਸਤੰਬਰ ਮਹੀਨੇ ਤੋਂ ਲੈ ਕੇ ਹੁਣ ਤੱਕ ਮੈਨੀਟੋਬਾ ਵਿਚ ਫਲੂ ਨਾਲ ਹੋਈਆਂ ਮੌਤਾਂ ਦੇ 15 ਮਾਮਲੇ ਸਾਹਮਣੇ ਆਏ ਹਨ | ਰਿਪੋਰਟ ਅਨੁਸਾਰ ਸਤੰਬਰ ਤੋਂ ਲੈ ਕੇ ਹੁਣ ਤੱਕ 213 ਲੋਕਾਂ ਨੂੰ ਫਲੂ ਹੋਣ ਕਾਰਨ ਹਸਪਤਾਲ ਭਰਤੀ ਕਰਨਾ ਪਿਆ, ਜਿਨ੍ਹਾਂ ‘ਚੋਂ 21 ਦੇ ਕਰੀਬ ਵਿਅਕਤੀਆਂ ਨੂੰ ਹਾਲਤ ਗੰਭੀਰ ਹੋਣ ਕਾਰਨ ਇੰਟੈਂਸਿਵ ਕੇਅਰ ਯੂਨਿਟ ਵਿਚ ਰੱਖਿਆ ਗਿਆ ਸੀ |
ਹੁਣ ਜਾਰੀ ਹੋਈ ਤਾਜ਼ਾ ਰਿਪੋਰਟ, ਜਿਸ ਵਿਚ 26 ਜਨਵਰੀ ਤੋਂ ਫਰਵਰੀ ਦੇ ਪਹਿਲੇ ਹਫ਼ਤੇ ਤੱਕ ਦੀ ਰਿਪੋਰਟ ਦਿੱਤੀ ਗਈ ਹੈ, ਅਨੁਸਾਰ ਇਸ ਸਮੇਂ ਦੌਰਾਨ ਫਲੂ ਦੇ 138 ਲੈਬ ਪੁਸ਼ਟੀਕਰਨ ਮਾਮਲੇ ਸਾਹਮਣੇ ਆਏ ਹਨ, ਜਿਨ੍ਹਾਂ ‘ਚੋਂ ਇਨਫਲੂਐਨਜ਼ਾ-ਏ ਦੇ 96 ਅਤੇ ਇਨਫਲੂਐਨਜ਼ਾ ਬੀ ਦੇ 42 ਮਾਮਲੇ ਸਾਹਮਣੇ ਆਏ ਹਨ ਅਤੇ ਸਤੰਬਰ ਮਹੀਨੇ ਤੋਂ ਲੈ ਕੇ ਹੁਣ ਤੱਕ ਕੁੱਲ ਮਿਲਾ ਕੇ 1,100 ਤੋਂ ਵੱਧ ਫਲੂ ਦੇ ਮਾਮਲਿਆਂ ਦੀ ਪੁਸ਼ਟੀ ਹੋ ਚੁੱਕੀ ਹੈ | ਮੈਨੀਟੋਬਾ ਦੇ ਮੁੱਖ ਜਨ ਸਿਹਤ ਅਧਿਕਾਰੀ ਡਾ: ਬਰੈਟ ਰਾਉਸਿਨ ਨੇ ਕਿਹਾ ਕਿ 5 ਫਰਵਰੀ ਤੱਕ ਮੈਨੀਟੋਬਾ ਵਿਚ ਨਾਵਲ ਕੋਰੋਨਾ ਵਾਇਰਸ ਦੇ 10 ਸ਼ੱਕੀ ਮਰੀਜ਼ਾਂ ਦੇ ਟੈਸਟ ਕੀਤੇ ਗਏ ਹਨ, ਜਿਨ੍ਹਾਂ ‘ਚੋਂ ਇਕ ਵੀ ਪਾਜ਼ਟਿਵ ਕੇਸ ਸਾਹਮਣੇ ਨਹੀਂ ਆਇਆ | ਇਸ ਸਮੇਂ ਇਨਫਲੂਐਨਜ਼ਾ, ਕੋਰੋਨਾ ਵਾਇਰਸ ਨਾਲੋਂ ਮੈਨੀਟੋਬਾ ਵਾਸੀਆਂ ਲਈ ਇਕ ਵੱਡਾ ਖ਼ਤਰਾ ਬਣਿਆ ਹੋਇਆ ਹੈ
ਰਿਪੋਰਟ ਅਨੁਸਾਰ ਮੈਨੀਟੋਬਾ ਦੀ ਲਗਪਗ ਇਕ ਚੌਥਾਈ ਆਬਾਦੀ ਨੂੰ ਇਸ ਮੌਸਮ ਵਿਚ ਫਲੂ ਦੇ ਟੀਕੇ ਲਗਾਏ ਜਾ ਚੁੱਕੇ ਹਨ, ਜਦਕਿ ਪਿਛਲੇ ਸਾਲ ਲਗਪਗ 23.6 ਫੀਸਦੀ ਹਿੱਸੇ ਨੂੰ ਫਲੂ ਦੇ ਟੀਕੇ ਲਗਾਏ ਗਏ ਸਨ | ਪਿਛਲੇ ਸਾਲ ਫਲੂ ਕਾਰਨ 17 ਦੇ ਕਰੀਬ ਮੌਤਾਂ ਦਰਜ ਕੀਤੀਆਂ ਗਈਆਂ ਸਨ |