ਚੰਦਰਯਾਨ-2 ਦੇ ਆਰਬਿਟਰ ਤੇ ਚੰਦਰਯਾਨ-3 ਦੇ ਲੈਂਡਰ ’ਚ ਸੰਪਰਕ ਕਾਇਮ

ਇਸਰੋ ਨੇ ਕਿਹਾ ਹੈ ਕਿ ਚੰਦਰਯਾਨ-2 ਦੇ ਆਰਬਿਟਰ ਅਤੇ ਚੰਦਰਯਾਨ-3 ਦੇ ਲੈਂਡਰ ਮਾਡਿਊਲ ਵਿਚਾਲੇ ਦੋ-ਤਰਫ਼ਾ ਸੰਪਰਕ ਸਥਾਪਿਤ ਹੋ ਗਿਆ ਹੈ। ਕੌਮੀ ਪੁਲਾੜ ਏਜੰਸੀ ਨੇ ‘ਐਕਸ’ ’ਤੇ ਪੋਸਟ ਕੀਤਾ,‘‘ਸਵਾਗਤ ਹੈ, ਦੋਸਤ! ਚੰਦਰਯਾਨ-2 ਆਰਬਿਟਰ ਨੇ ਰਸਮੀ ਤੌਰ ’ਤੇ ਚੰਦਰਯਾਨ-3 ਦੇ ਲੈਂਡਰ ਮਾਡਿਊਲ ਦਾ ਸਵਾਗਤ ਕੀਤਾ ਹੈ। ਦੋਹਾਂ ਵਿਚਕਾਰ ਦੋ-ਤਰਫ਼ਾ ਸੰਪਰਕ ਸਥਾਪਿਤ ਹੋਇਆ ਹੈ। ਮਿਸ਼ਨ ਅਪਰੇਸ਼ਨਜ਼ ਕੰਪਲੈਕਸ (ਐੱਮਓਐਕਸ) ਕੋਲ ਲੈਂਡਰ ਮਾਡਿਊਲ ਤੱਕ ਪਹੁੰਚਣ ਦੇ ਹੁਣ ਹੋਰ ਵਧੇਰੇ ਰੂਟ ਹਨ।’’ ਇਸਰੋ ਨੇ ਐਤਵਾਰ ਨੂੰ ਕਿਹਾ ਸੀ ਕਿ ਚੰਦਰਯਾਨ-3 ਦੇ ਲੈਂਡਰ ਮਾਡਿਊਲ ਦੇ 23 ਅਗਸਤ ਨੂੰ ਸ਼ਾਮ 6 ਵਜ ਕੇ 4 ਮਿੰਟ ’ਤੇ ਚੰਨ ਦੀ ਸਤਹਿ ’ਤੇ ਪਹੁੰਚਣ ਦੀ ਸੰਭਾਵਨਾ ਹੈ। ਐੱਮਓਐਕਸ ਇਥੇ ਇਸਰੋ ਟੈਲੀਮੈਟਰੀ, ਟਰੈਕਿੰਗ ਅਤੇ ਕਮਾਂਡ ਨੈੱਟਵਰਕ ’ਚ ਸਥਿਤ ਹੈ। ਇਸਰੋ ਨੇ ਇਹ ਵੀ ਕਿਹਾ ਕਿ ਹੁਣ ਲੈਂਡਿੰਗ ਦਾ ਸਿੱਧਾ ਪ੍ਰਸਾਰਣ 23 ਅਗਸਤ ਨੂੰ ਸ਼ਾਮ 5 ਵਜ ਕੇ 20 ਮਿੰਟ ਤੋਂ ਸ਼ੁਰੂ ਹੋਵੇਗਾ। ਜ਼ਿਕਰਯੋਗ ਹੈ ਕਿ ਆਰਬਿਟਰ, ਲੈਂਡਰ ਅਤੇ ਰੋਵਰ ਨਾਲ ਲੈਸ ਚੰਦਰਯਾਨ-2 ਨੂੰ 2019 ’ਚ ਲਾਂਚ ਕੀਤਾ ਗਿਆ ਸੀ। ਲੈਂਡਰ ਅਤੇ ਰੋਵਰ ਚੰਨ ਦੀ ਸਤਹਿ ’ਤੇ ਕ੍ਰੈਸ਼ ਕਰ ਗਏ ਸਨ ਜਿਸ ਕਾਰਨ ਸਾਫ਼ਟ ਲੈਂਡਿੰਗ ਦਾ ਮਿਸ਼ਨ ਨਾਕਾਮ ਹੋ ਗਿਆ ਸੀ। ਇਸਰੋ ਨੇ 2019 ’ਚ ਕਿਹਾ ਸੀ ਕਿ ਆਰਬਿਟਰ ਦਾ ਸਮਾਂਕਾਲ ਸੱਤ ਸਾਲ ਤੱਕ ਵਧਾਇਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਇਸਰੋ ਨੇ ਬੀਤੇ ਦਿਨੀਂ ਚੰਦਰਯਾਨ-3 ਉੱਤੇ ਲੱਗੇ ਕੈਮਰਿਆਂ ਨਾਲ ਖਿੱਚੀਆਂ ਗਈਆਂ  ਚੰਨ ਦੀਆਂ ਤਸਵੀਰਾਂ ਵੀ ਰਿਲੀਜ਼ ਕੀਤੀਆਂ ਸਨ।