RelatedPosts
ਬਰਨਾਲਾ, 14 ਜੁਲਾਈ (ਰਾਕੇਸ਼ ਗੋਇਲ/ਰਾਹੁਲ ਬਾਲੀ):- ਫਸਲਾਂ ਦਾ ਲਾਹੇਵੰਦ ਭਾਅ ਲੈਣ ਲਈ ਪ੍ਰੋਸੈਸਿੰਗ ਅਤੇ ਮੰਡੀਕਰਨ ਖੁਦ ਕਰਨ ਨਾਲ ਮੁਨਾਫਾ ਕਈ ਗੁਣਾ ਹੋ ਜਾਂਦਾ ਹੈ। ਇਹ ਪ੍ਰਗਟਾਵਾ ਮੁੱਖ ਖੇਤੀਬਾੜੀ ਅਫਸਰ ਡਾ. ਬਲਦੇਵ ਸਿੰਘ ਨੇ ਪਿੰਡ ਹਰੀਗੜ੍ਹ ਦੇ ਦੌਰੇ ਦੌਰਾਨ ਕੀਤਾ, ਜਿੱਥੇ ਕੈਲੀਫੋਰਨੀਆ (ਯੂਐਸਏ) ਤੋਂ ਆਇਆ ਸੁਖਵਿੰਦਰ ਸਿੰਘ ਮੱਕੀ ਦੀ ਫਸਲ ਵਿੱਚ ਧਨੀਏ ਦੀ ਖੇਤੀ ਕਰ ਰਿਹਾ ਹੈ। ਸੁਖਵਿੰਦਰ ਸਿੰਘ ਖੁਦ ਮੰਡੀਕਰਨ ਕਰ ਕੇ ਵਧੀਆ ਮੁਨਾਫਾ ਲੈ ਰਿਹਾ ਹੈ।
ਉਨ੍ਹਾਂ ਦੱਸਿਆ ਕਿ ਇਹ ਕਿਸਾਨ ਗਰਮੀ ਵਿੱਚ ਧਨੀਏ ਦੀਆਂ ਗੁੱਛੀਆਂ ਬਣਾ ਕੇ ਅਤੇ ਮੱਕੀ ਦੀਆਂ ਛੱਲੀਆਂ ਆਪ ਹੀ ਮੰਡੀ ਵਿੱਚ ਵੇਚਦਾ ਹੈ, ਜਿਸ ਨਾਲ ਇਹ ਕਿਸਾਨ ਚੰਗਾ ਮੁਨਾਫਾ ਲੈ ਰਿਹਾ ਹੈ। ਡਾ. ਬਲਦੇਵ ਸਿੰਘ ਨੇ ਦੱਸਿਆ ਕਿ ਇਸ ਸਮੇਂ ਪੰਜਾਬ ਦੀ ਨੌਜਵਾਨ ਪੀੜ੍ਹੀ ਵਿਦੇਸ਼ਾਂ ਵੱਖ ਰੁਖ ਕਰ ਰਹੀ ਹੈ, ਜੋ ਚਿੰਤਾ ਦਾ ਵਿਸ਼ਾ ਹੈ, ਪਰ ਜੇਕਰ ਸਾਡੀ ਨੌਜਵਾਨ ਪੀੜ੍ਹੀ ਸੁਖਵਿੰਦਰ ਸਿੰਘ ਵਰਗਿਆਂ ਤੋਂ ਸੇਧ ਲਵੇ ਤਾਂ ਉਹ ਵੀ ਖੇਤੀ ਵਿੱਚੋਂ ਚੰਗਾ ਮੁਨਾਫਾ ਕਮਾ ਸਕਦੇ ਹਨ। ਉਨ੍ਹਾਂ ਅਪੀਲ ਕੀਤੀ ਕਿ ਕਿਸਾਨ ਆਪਣੀ ਫਸਲ ਦਾ ਸਿੱਧਾ ਮੰਡੀਕਰਨ ਕਰ ਸਕਦੇ ਹਨ, ਜਿਨ੍ਹਾਂ ਨਾਲ ਉਨ੍ਹਾਂ ਨੂੰ ਚੰਗਾ ਮੁਨਾਫਾ ਹੁੰਦਾ ਹੈ। ਉਹ ਜੇਕਰ ਆਪਣੀ ਫਸਲ ਦਾ ਵੈਲਯੂ ਐਡੀਸ਼ਨ ਕਰਨ ਭਾਵ ਉਨ੍ਹਾਂ ਤੋਂ ਹੋਰ ਵਸਤਾਂ ਬਣਾ ਕੇ ਜਿਵੇਂ ਕਿ ਕਣਕ ਤੋਂ ਆਟਾ, ਦਲੀਆ, ਸੇਵੀਆਂ ਤੇ ਹੋਰ ਵਸਤਾਂ ਵੇੇਚਣ ਤਾਂ ਉਹ ਲਗਭਗ ਦੂਹਰਾ ਮੁਨਾਫਾ ਲੈ ਸਕਦੇ ਹਨ। ਇਸ ਤੋਂ ਇਲਾਵਾ ਕਿਸਾਨ ਸਬਜ਼ੀਆਂ ਉਗਾ ਕੇ ਜਾਂ ਫਿਰ ਹੋਰ ਸਹਾਇਕ ਧੰਦੇ ਅਪਣਾ ਕੇ ਵੀ ਚੰਗਾ ਮੁਨਾਫਾ ਲੈ ਸਕਦੇ ਹਨ।
ਉਨ੍ਹਾਂ ਕਿਹਾ ਕਿ ਅਜਿਹੇ ਨੌਜਵਾਨ ਜੋ ਸਹਾਇਕ ਧੰਦੇ ਅਪਨਾਉਣਾ ਚਾਹੁੰਦੇ ਹਨ ਜਾਂ ਫਿਰ ਵੈਲਯੂ ਐਡੀਸ਼ਨ ਕਰਕੇ ਆਪਣੀ ਕਮਾਈ ਦੇ ਸਾਧਨ ਵਧਾਉਣਾ ਚਾਹੁੰਦੇ ਹਨ ਤਾਂ ਉਹ ਆਤਮਾ ਸਕੀਮ ਤਹਿਤ ਗਰੁੱਪ ਬਣਾ ਕੇ ਟ੍ਰੇਨਿੰਗ ਲੈ ਕੇ ਇਹ ਕੰਮ ਚਲਾ ਸਕਦੇ ਹਨ। ਇਸ ਲਈ ਅਜਿਹੇ ਨੌਜਵਾਨ ਮੁੱਖ ਖੇਤੀਬਾੜੀ ਅਫਸਰ ਦੇ ਦਫਤਰ ਜਾਂ ਫਿਰ ਬਲਾਕ ਦਫਤਰਾਂ ਵਿੱਚ ਸੰਪਰਕ ਕਰਨ।
