RelatedPosts
ਸਿਆਟਲ, 04 ਫਰਵਰੀ (ਪ੍ਰੈਸ ਕੀ ਤਾਕਤ ਬਿਊਰੋ):- ਚੀਨ ਤੋਂ ਸ਼ੁਰੂ ਹੋਏ ਖ਼ਤਰਨਾਕ ‘ਕੋਰੋਨਾ ਵਾਇਰਸ’ ਕਾਰਨ ਅਮਰੀਕਾ ਦੇ ਲੋਕ ਵੀ ਭਾਰੀ ਦਹਿਸ਼ਤ ‘ਚ ਹਨ, ਜਿਸ ਕਾਰਨ ਵਪਾਰ ‘ਤੇ ਇਸ ਦਾ ਬਹੁਤ ਮਾੜਾ ਅਸਰ ਦੇਖਣ ਨੂੰ ਮਿਲ ਰਿਹਾ ਹੈ | ਤਾਜ਼ਾ ਰਿਪੋਰਟਾਂ ਅਨੁਸਾਰ ਇੱਥੇ ਤਕਰੀਬਨ ਹਰ ਸ਼ਹਿਰ ‘ਚ ‘ਚਾਈਨਾ ਟੋਨ’ ਭਾਵ ਚੀਨੀ ਬਾਜ਼ਾਰ ਤੇ ਚੀਨੀ ਰੈਸਟੋਰੈਂਟ ਬਣੇ ਹੋਏ ਹਨ, ਜਿੱਥੇ ਬੇਰੌਣਕੀ ਪਸਰੀ ਪਈ ਹੈ | ਲੋਕ ਏਨੇ ਡਰ ਗਏ ਹਨ ਕਿ ਚੀਨੀ ਰੈਸਟੋਰੈਂਟਾਂ ਵਿਚ ਨਾ ਦੇ ਬਰਾਬਰ ਹੀ ਜਾ ਰਹੇ ਹਨ | ਸਿਆਟਲ ਦੇ ਕੁਝ ਬਹੁਤ ਪੁਰਾਣੇ ਤੇ ਪ੍ਰਸਿੱਧ ਚੀਨੀ ਰੈਸਟੋਰੈਂਟਾਂ ਦੇ ਮਾਲਕਾਂ ਨਾਲ ਜਦੋਂ ਇਸ ਮੁੱਦੇ ‘ਤੇ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਮੰਨਿਆ ਕਿ ਇਸ ਵਾਇਰਸ ਕਾਰਨ ਉਨ੍ਹਾਂ ਦੇ ਵਪਾਰ ‘ਤੇ ਬਹੁਤ ਵੱਡੀ ਸੱਟ ਵੱਜੀ ਹੈ | ਜਦੋਂ ਕਿ ਸਾਡੇ ਇੱਥੇ ਅਜਿਹੀ ਕੋਈ ਗੱਲ ਨਹੀਂ ਹੈ ਤੇ ਅਸੀਂ ਸਫ਼ਾਈ ਦਾ ਤਾਂ ਪਹਿਲਾਂ ਹੀ ਬਹੁਤ ਧਿਆਨ ਰੱਖਦੇ ਸੀ ਅਤੇ ਇੱਥੋਂ ਦਾ ਫੂਡ ਮਹਿਕਮਾ ਪਹਿਲਾਂ ਹੀ ਬਹੁਤ ਸਖ਼ਤ ਹੈ ਪਰ ਫਿਰ ਵੀ ਲੋਕ ਡਰ ਦੇ ਮਾਰੇ ਨਹੀਂ ਆ ਰਹੇ, ਜਿਸ ਕਾਰਨ ਉਹ ਬਹੁਤ ਵੱਡੀ ਮੰਦਹਾਲੀ ਦੇ ਦੌਰ ‘ਚੋਂ ਗੁਜ਼ਰ ਰਹੇ ਹਨ |
ਇਸੇ ਤਰ੍ਹਾਂ ਇਸ ਵਾਇਰਸ ਕਾਰਨ ਏਅਰ ਲਾਈਨਾਂ ‘ਤੇ ਵੀ ਬਹੁਤ ਮਾੜਾ ਅਸਰ ਪਿਆ ਹੈ | ਲੋਕਾਂ ਨੇ ਜ਼ਰੂਰੀ ਕੰਮਾਂ ਤੋਂ ਬਿਨਾਂ ਅਮਰੀਕਾ ਟਿਕਟਾਂ ਕੈਂਸਲ ਕਰਵਾ ਦਿੱਤੀਆਂ ਹਨ | ਕਈ ਉਡਾਣਾਂ ਤਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ | ਲੋਕ ਇਸ ਵਾਇਰਸ ਕਾਰਨ ਕੋਈ ਖ਼ਤਰਾ ਮੁੱਲ ਨਹੀਂ ਲੈਣਾ ਚਾਹੁੰਦੇ, ਜਿਸ ਕਾਰਨ ਹੋਟਲ ਕਾਰੋਬਾਰ ‘ਤੇ ਵੀ ਮਾੜਾ ਅਸਰ ਪਿਆ ਹੈ | ਸਿਆਟਲ ਦੇ ਪ੍ਰਸਿੱਧ ਹੋਟਲ ਕਾਰੋਬਾਰੀ ਜਤਿੰਦਰ ਸਿੰਘ ਸਪਰਾਏ ਨੇ ਕਿਹਾ ਕਿ ‘ਕੋਰੋਨਾ ਵਾਇਰਸ’ ਕਾਰਨ ਲੋਕਾਂ ਨੇ ਪਿਛਲੇ ਕੁਝ ਦਿਨਾਂ ਤੋਂ ਬਹੁਤ ਬੁਕਿੰਗਾਂ ਕੈਂਸਲ ਕਰਵਾ ਦਿੱਤੀਆਂ ਹਨ ਤੇ ਅੱਗੇ ਨਵੀਆਂ ਬੁਕਿੰਗ ਵੀ ਬਹੁਤ ਘੱਟ ਗਈਆਂ ਹਨ | ਭਾਰੀ ਸੰਕਟ ‘ਚੋਂ ਨਿਕਲ ਰਹੇ ਟੈਕਸੀ ਕਾਰੋਬਾਰੀਆਂ ਨੇ ਕਿਹਾ ਕਿ ਇੱਥੇ ਏਅਰਪੋਰਟਾਂ ‘ਤੇ ਬਹੁਤ ਮੰਦਹਾਲੀ ਦਾ ਦੌਰ ਹੈ, ਕਿਉਂਕਿ ਲੋਕ ਬਹੁਤ ਘੱਟ ਆ ਜਾ ਰਹੇ ਹਨ |
