ਵੈਨਕੂਵਰ, 2 ਮਈ (ਅਮ੍ਰਿਤਪਾਲ ਸਿੰਘ ਸਾਹਨੀ)- ਕੈਨੇਡਾ ‘ਚ ਕੋਵਿਡ-19 ਦੇ ਮਰੀਜ਼ਾਂ ਦੀ ਗਿਣਤੀ ਬੀਤੇ ਡੇਢ ਕੁ ਮਹੀਨੇ ਤੋਂ ਲਗਾਤਾਰ ਵੱਧ ਰਹੀ ਹੈ ਪਰ ਅਜੇ ਤੱਕ ਸਾਰਾ ਕੈਨੇਡਾ ਇਸ ਦੀ ਲਪੇਟ ‘ਚ ਨਹੀਂ ਸੀ. ਦੇਸ਼ ਦੇ ਧੁਰ ਉੱਤਰ ‘ਚ ਨੂਨਾਵੁੱਟ ਇਲਾਕਾ ਕੋਰੋਨਾ ਵਾਇਰਸ ਦੀ ਮਾਰ ਤੋਂ ਬਾਹਰ ਸੀ ਪਰ ਬੀਤੇ ਕੱਲ੍ਹ ਓਥੇ ਵੀ ਇਕ ਵਿਅਕਤੀ ਦਾ ਟੈਸਟ ਪਾਜ਼ਟਿਵ ਆ ਗਿਆ. ਮੌਤਾਂ ਹੋਣਾ ਵੀ ਜਾਰੀ ਹੈ ਤੇ ਹੁਣ ਤੱਕ ਲਗਪਗ 3200 ਮਰੀਜ਼ਾਂ ਦੀਆਂ ਜਾਨਾਂ ਜਾ ਚੁੱਕੀਆਂ ਹਨ, ਜਿਨ੍ਹਾਂ ‘ਚ ਅੱਧੇ ਤੋਂ ਵੱਧ ਮੌਤਾਂ (1860 ਤੋਂ ਵੱਧ) ਕਿਊਬਕ ‘ਚ ਹੋਈਆਂ ਹਨ. ਹੁਣ ਤੱਕ ਕੁੱਲ ਮਰੀਜ਼ਾਂ ਦਾ ਅੰਕੜਾ 53000 ਤੋਂ ਵੱਧ ਚੁੱਕਾ ਹੈ, ਜਿਨ੍ਹਾਂ ਵਿਚੋਂ 21000 ਦੇ ਕਰੀਬ ਠੀਕ ਵੀ ਹੋ ਚੁੱਕੇ ਹਨ, ਜਿਸ ਦਾ ਭਾਵ ਹੈ ਕਿ 32000 ਦੇ ਕਰੀਬ ਲੋਕ ਪੀੜਤ ਹਨ. ਕੈਨੇਡਾ ‘ਚ ਬਹੁਤੇ ਕੇਸ ਚੀਨ ਤੋਂ ਨਹੀਂ ਅਮਰੀਕਾ ਤੋਂ ਆਏ ਹਨ. ਕਿਊਬਕ ਤੇ ਉਂਟਾਰੀਓ ਸਭ ਤੋਂ ਵੱਧ ਪ੍ਰਭਾਵਿਤ ਸੂਬੇ ਹਨ. ਉਂਟਾਰੀਓ ‘ਚ ਅਪ੍ਰੈਲ ਦੇ ਅੱਧ ਤੱਕ ਵਿਦੇਸ਼ਾਂ ਤੋਂ ਆਏ 1201 ਮਰੀਜ਼ਾਂ ‘ਚੋਂ ਅਮਰੀਕਾ ਤੋਂ 404 ਹਨ, ਇੰਗਲੈਂਡ ਤੋਂ 126, ਚੀਨ ਤੋਂ 5 ਤੇ ਭਾਰਤ ਤੋਂ ਆਏ 14 ਕੇਸ ਸ਼ਾਮਿਲ ਹਨ.