ਪਟਿਆਲਾ, 3 ਮਈ (ਡਾ. ਜਗਮੋਹਨ ਸ਼ਰਮਾ /ਪ੍ਰੈਸ ਕੀ ਤਾਕਤ ਬਿਊਰੋ) : ਪੰਜਾਬੀ ਯੂਨੀਵਰਸਿਟੀ ਦੇ ਨ੍ਰਿਤ ਵਿਭਾਗ ਵੱਲੋਂ ਕਲਾ ਭਵਨ ਵਿਖੇ 29 ਅਪ੍ਰੈਲ, 2022 ਨੂੰ ਕੌਮਾਂਤਰੀ ਨਾਚ ਦਿਹਾੜਾ ਮਨਾਇਆ ਗਿਆ ਅਤੇ 30 ਅਪ੍ਰੈਲ, 2022 ਨੂੰ ਪੰਜਾਬੀ ਯੂਨੀਵਰਸਿਟੀ, ਪਟਿਆਲਾ ਦਾ ਸਥਾਪਨਾ ਦਿਵਸ ਮਨਾਇਆ ਗਿਆ। ਵਿਭਾਗ ਦੇ ਵਿਦਿਆਰਥੀਆਂ ਦੀਆਂ ਸ਼ਾਨਦਾਰ ਨਾਚ ਪੇਸ਼ਕਾਰੀਆਂ ਰਾਹੀਂ ਇਹ ਪ੍ਰੋਗਰਾਮ ਨੇਪਰੇ ਚੜਿਆ। 29 ਅਪ੍ਰੈਲ ਅਤੇ 30 ਅਪ੍ਰੈਲ 2022 ਨੂੰ ਦਿੱਲੀ ਤੋਂ ਸੱਦੇ ਗਏ ਉੱਘੇ ਕੱਥਕ ਕਲਾਕਾਰ ਗੌਰੀ ਦਿਵਾਕਰ ਦੀ ਸ਼ਾਨਦਾਰ ਪੇਸ਼ਕਾਰੀ ਹੋਈ। ਇਹ ਦੋਵੇਂ ਸਮਾਗਮ ਕੈਲਗਰੀ, ਕੈਨੇਡਾ ਤੋਂ “ਸਰਬ ਅਕਾਲ ਮਿਊਜ਼ਿਕ ਸੋਸਾਇਟੀ” ਦੇ ਪ੍ਰਧਾਨ ਸ.ਹਰਜੀਤ ਸਿੰਘ ਵੱਲੋਂ ਪ੍ਰਦਾਨ ਕੀਤੀ ਗਈ ਵਿੱਤੀ ਮਦਦ ਅਤੇ ਸਹਿਯੋਗ ਨਾਲ ਸਫਲਤਾਪੂਰਵਕ ਆਯੋਜਿਤ ਕੀਤੇ ਗਏ ਸਨ।
ਕੌਮਾਂਤਰੀ ਨਾਚ ਦਿਹਾੜਾ ਜੋ ਕਿ ਵਿਭਾਗ ਦਾ ਸਾਲਾਨਾ ਸਮਾਗਮ ਹੈ, ਵਿਸ਼ੇਸ਼ ਤੌਰ ‘ਤੇ 29 ਅਪ੍ਰੈਲ, 2022 ਨੂੰ ਕੱਥਕ ਸਮਰਾਟ ਪਦਮ ਵਿਭੂਸ਼ਣ ਪੀ. ਬਿਰਜੂ ਮਹਾਰਾਜ ਨੂੰ ਸਮਰਪਿਤ ਕੀਤਾ ਗਿਆ ਸੀ ਅਤੇ 30 ਅਪ੍ਰੈਲ 2022 ਨੂੰ ਪੰਜਾਬੀ ਯੂਨੀਵਰਸਿਟੀ ਦਾ ਸਥਾਪਨਾ ਦਿਵਸ ਨਿਰਤ ਵਿਭਾਗ ਦੀ ਕਲਾਕਾਰ ਅਤੇ ਸਟਾਫ, ਮਰਹੂਮ ਡਾ. ਵਿੰਪੀ ਪਰਮਾਰ ਜਿਨ੍ਹਾਂ ਦੀ ਬਦਕਿਸਮਤੀ ਨਾਲ ਇੱਕ ਮਹੀਨਾ ਪਹਿਲਾਂ 29-03-2022 ਨੂੰ ਮੌਤ ਹੋ ਗਈ ਸੀ, ਨੂੰ ਸਮਰਪਿਤ ਕੀਤਾ ਗਿਆ ਸੀ।
ਸਮੂਹ ਅਧਿਆਪਨ ਅਤੇ ਗ਼ੈਰ ਅਧਿਆਪਨ ਸਟਾਫ਼ ਅਤੇ ਵਿਭਾਗ ਦੇ ਸਮੂਹ ਵਿਦਿਆਰਥੀਆਂ ਦੇ ਪੂਰਨ ਸਹਿਯੋਗ ਨਾਲ ਇਸ ਸਮਾਗਮ ਦਾ ਆਯੋਜਨ ਡਾ. ਇੰਦਰਾ ਬਾਲੀ, ਮੁਖੀ ਨ੍ਰਿਤ ਵਿਭਾਗ ਦੀ ਅਗਵਾਈ ਵਿੱਚ ਕੀਤਾ ਗਿਆ, ਜਿਨ੍ਹਾਂ ਨੇ ਇਸ ਦੋ ਰੋਜ਼ਾ ਇਸ ਸਮਾਗਮ ਦਾ ਸੰਚਾਲਨ ਵੀ ਕੀਤਾ।
29 ਅਪ੍ਰੈਲ 2022 ਨੂੰ ਯੂਨੈਸਕੋ ਅਧੀਨ ਅੰਤਰਰਾਸ਼ਟਰੀ ਡਾਂਸ ਕੌਂਸਲ ਵੱਲੋਂ ਘੋਸ਼ਿਤ ਹੋਏ ਕੌਮਾਂਤਰੀ ਨਾਚ ਦਿਹਾੜੇ ਦੇ ਸੰਬੰਧ ਵਿੱਚ, ਵਿਭਾਗ ਦੇ ਵਿਦਿਆਰਥੀਆਂ ਨੇ ਕਲਾਸੀਕਲ ਡਾਂਸ ਕਥਕ ਤੋਂ ਲੈ ਕੇ ਉੱਤਰੀ ਭਾਰਤ, ਖਾਸ ਕਰਕੇ ਪੰਜਾਬ ਦੇ ਲੋਕ ਨਾਚਾਂ ਤੱਕ ਵੱਖ-ਵੱਖ ਨਾਚ ਪੇਸ਼ ਕੀਤੇ।
ਸਮਾਗਮ ਦੀ ਸ਼ੁਰੂਆਤ ਯੂਨੀਵਰਸਿਟੀ ਧੁਨੀ ਦੇ ਵਾਦਨ ਨਾਲ ਹੋਈ। ਇਸ ਤੋਂ ਬਾਅਦ ਮੁੱਖ ਮਹਿਮਾਨ ਪ੍ਰੋ. ਡਾ.ਅਰਵਿੰਦ, ਵਾਇਸ ਚਾੰਸਲਰ ਸਾਹਿਬ ਦਾ ਡਾਂਸ ਵਿਭਾਗ ਦੇ ਮੁਖੀ ਡਾ. ਇੰਦਰਾ ਬਾਲੀ ਵੱਲੋਂ ਫੁੱਲਾਂ ਦੇ ਗੁਲਦਸਤੇ ਨਾਲ ਸਵਾਗਤ ਕੀਤਾ ਗਿਆ। ਡੀਨ ਫੈਕਲਟੀ ਆਫ਼ ਆਰਟਸ ਐਂਡ ਕਲਚਰ, ਪ੍ਰੋ.ਡਾ.ਰਜਿੰਦਰ ਸਿੰਘ ਗਿੱਲ ਦਾ ਸਵਾਗਤ ਡਾ. ਇੰਦਰਾ ਬਾਲੀ, ਮੁਖੀ ਡਾਂਸ ਵਿਭਾਗ ਅਤੇ ਡਾ. ਸਿੰਮੀ ਐਸੋਸੀਏਟ ਪ੍ਰੋਫੈਸਰ ਨੇ ਕੀਤਾ। ਮੁੱਖ ਮਹਿਮਾਨ ਅਤੇ ਹੋਰ ਸਾਰੇ ਪਤਵੰਤਿਆਂ ਵੱਲੋਂ ਸ਼ਮ੍ਹਾਂ ਰੌਸ਼ਨ ਕਰਨ ਉਪਰੰਤ ਪ੍ਰੋ.ਰਜਿੰਦਰ ਗਿੱਲ, ਡੀਨ ਫੈਕਲਟੀ ਨੇ ਵਾਈਸਚਾਂਸਲਰ ਪ੍ਰੋ.ਅਰਵਿੰਦ ਦਾ ਸਵਾਗਤ ਕੀਤਾ।
ਮਰਹੂਮ ਡਾ. ਵਿੰਪੀ ਪਰਮਾਰ ਵੱਲੋਂ ਨਾਚ ਦੇ ਖੇਤਰ ਵਿੱਚ ਕੀਤੀਆਂ ਪ੍ਰਾਪਤੀਆਂ ਅਤੇ ਪੰਜਾਬ ਦੇ ਲੋਕ ਨਾਚਾਂ ਦੇ ਖੇਤਰ ਵਿੱਚ ਪੰਜਾਬੀ ਯੂਨੀਵਰਸਿਟੀ ਵਿੱਚ ਉਸ ਦਾ ਯੋਗਦਾਨ ਨੂੰ ਦਰਸਾਉਣ ਬਾਰੇ ਇੱਕ ਵੀਡੀਓ ਪੇਸ਼ਕਾਰੀ ਰਾਹੀਂ ਸ਼ਰਧਾਂਜਲੀ ਭੇਂਟ ਕੀਤੀ ਗਈ। । ਇਸ ਤੋਂ ਬਾਅਦ ਵਿਭਾਗ ਦੇ ਲਗਭਗ 65 ਤੋਂ 70 ਵਿਦਿਆਰਥੀਆਂ ਅਤੇ ਹੋਰ ਸੱਦੇ ਗਏ ਵਿਦਿਆਰਥੀ ਕਲਾਕਾਰਾਂ ਦੁਆਰਾ ਲਗਭਗ 12 ਤੋਂ 15 ਪੇਸ਼ਕਾਰੀਆਂ ਦਾ ਡੇਢ ਘੰਟੇ ਦਾ ਪ੍ਰੋਗਰਾਮ ਪੇਸ਼ ਕੀਤਾ ਗਿਆ।
ਮੁੱਖ ਮਹਿਮਾਨ ਪ੍ਰੋ.ਅਰਵਿੰਦ ਨੇ ਕਲਾਸੀਕਲ ਡਾਂਸ ਕੱਥਕ ਅਤੇ ਪੰਜਾਬ ਦੇ ਲੋਕ ਨਾਚਾਂ ਦੀਆਂ ਰਵਾਇਤੀ ਕਲਾਵਾਂ ਨੂੰ ਸੁਰੱਖਿਅਤ ਰੱਖਣ ਲਈ ਵਿਦਿਆਰਥੀਆਂ ਅਤੇ ਸਟਾਫ਼ ਦੁਆਰਾ ਕੀਤੇ ਗਏ ਯਤਨਾਂ ਦੀ ਸ਼ਲਾਘਾ ਕੀਤੀ। ਉਨ੍ਹਾਂ ਕਿਹਾ ਕਿ ਵਿੱਦਿਅਕ ਅਦਾਰਿਆਂ ਨੂੰ ਵਿਦਿਆਰਥੀਆਂ ਅਤੇ ਦੇਸ਼ ਦੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਸਹੀ ਸੇਧ ਦੇਣੀ ਚਾਹੀਦੀ ਹੈ।
ਐੱਮ.ਏ ਭਾਗ-2 ਦੇ ਵਿਦਿਆਰਥੀਆਂ ਦੁਆਰਾ ਕਲਾਸੀਕਲ ਡਾਂਸ ਕੱਥਕ, ਗੈਸਟ ਫੈਕਲਟੀ ਟੀਚਰ, ਵਿਦਿਆ ਗੌਰੀ ਦੁਆਰਾ ਕੋਰੀਓਗ੍ਰਾਫੀ, ਐੱਮ.ਏ.-1 ਦੇ ਵਿਦਿਆਰਥੀਆਂ ਦੁਆਰਾ ਸੂਫੀਆਨਾ ਪ੍ਰਦਰਸ਼ਨ, ਗੈਸਟ ਫੈਕਲਟੀ ਟੀਚਰ ਅਰਸ਼ਦੀਪ ਕੌਰ ਦੁਆਰਾ ਕੋਰੀਓਗ੍ਰਾਫ਼ ਕੀਤਾ ਗਿਆ, ਭਾਈ ਵੀਰ ਸਿੰਘ ਦੀ ਕਵਿਤਾ ‘ਤੇ ਕਲਾਸੀਕਲ ਡਾਂਸ ਕੰਪੋਜੀਸ਼ਨ, ਅਰਸ਼ਦੀਪ ਕੌਰ ਭੱਟੀ ਦੁਆਰਾ ਪੇਸ਼ ਕੀਤੀ ਗਈ ਅਤੇ ਡਾ. ਇੰਦਰਾ ਬਾਲੀ ਦੁਆਰਾ ਕੋਰੀਓਗ੍ਰਾਫ਼ ਕੀਤੀ ਗਈ “ਸੁਪਨੇ ਵਿਚ ਤੁਸੀ ਮਿਲੇ ਅਸਾਂ ਨੂੰ ਅਸਾਂ ਧਾਹ ਗਲ ਵਕੜੀ ਪਾਈ” ਦੀ ਸੁਹਜ ਭਰਪੂਰ ਪੇਸ਼ਕਾਰੀ ਲਈ ਬਹੁਤ ਸਰਾਹਿਆ ਗਿਆ।
ਪੰਜ ਸਾਲਾ ਇੰਟੀਗਰੇਟਿਡ ਕੋਰਸ ਦੇ ਦੋ ਵਿਦਿਆਰਥੀਆਂ ਦੁਆਰਾ ਕੀਤੇ ਗਏ ਜੁਗਲਬੰਦੀ ਪ੍ਰਦਰਸ਼ਨ ਦੀ ਬਹੁਤ ਪ੍ਰਸ਼ੰਸਾ ਕੀਤੀ ਗਈ।
ਹਰੀਸ਼ ਸ਼ਰਮਾ ਦੁਆਰਾ ਕੋਰੀਓਗ੍ਰਾਫ਼ ਕੀਤੇ ਗਏ ਹਿਮਾਚਲ ਦੇ ਲੋਕ ਨਾਚ ਨਾਟੀ, ਹਰਿਆਣਵੀ, ਸੰਮੀ ਅਤੇ ਖਾਸ ਤੌਰ ‘ਤੇ ਛੋਟੇ ਲੜਕਿਆਂ ਦੇ ਝੂੰਮਰ ਦੀ ਪੇਸ਼ਕਾਰੀ ਨੂੰ ਦਰਸ਼ਕਾਂ ਦਾ ਭਰਵਾਂ ਹੁੰਗਾਰਾ ਮਿਲਿਆ। ਬਲਕਰਨ ਬਰਾੜ ਦੁਆਰਾ ਕੋਰੀਓਗ੍ਰਾਫ਼ ਕੀਤੇ ਗਏ ਭੰਗੜੇ ਦੇ ਫਾਈਨਲ ਪ੍ਰਦਰਸ਼ਨ ਨਾਲ਼ ਸਾਰਾ ਹਾਲ ਤਾੜੀਆਂ ਦੀ ਗੂੰਜ ਨਾਲ ਭਰ ਗਿਆ।
ਅਗਲੇ ਦਿਨ 30 ਅਪ੍ਰੈਲ 2022 ਨੂੰ ਪੰਜਾਬੀ ਯੂਨੀਵਰਸਿਟੀ ਸਥਾਪਨਾ ਦਿਹਾੜੇ ਮੌਕੇ ਵਿਸ਼ੇਸ਼ ਮਹਿਮਾਨ ਸ.ਹਰਜੀਤ ਸਿੰਘ ਪ੍ਰਧਾਨ, ਸਰਬ ਅਕਾਲ ਮਿਊਜ਼ਿਕ ਸੁਸਾਇਟੀ, ਕੈਲਗਰੀ, ਕੈਨੇਡਾ ਨੇ ਵਿਸ਼ੇਸ਼ ਤੌਰ ‘ਤੇ ਸ਼ਿਰਕਤ ਕੀਤੀ। ਪ੍ਰੋਗਰਾਮ ਦੀ ਪ੍ਰਧਾਨਗੀ ਯੂਨੀਵਰਸਿਟੀ ਦੇ ਡੀਨ ਅਕਾਦਮਿਕ ਪ੍ਰੋ.ਬੀ.ਐਸ.ਸੰਧੂ ਨੇ ਕੀਤੀ।
ਡਾ.ਇੰਦਰਾ ਬਾਲੀ, ਮੁਖੀ ਡਾਂਸ ਵਿਭਾਗ ਨੇ ਵਿਭਾਗ ਵੱਲੋਂ ਮੁੱਖ ਮਹਿਮਾਨ
ਪ੍ਰੋ.ਡਾ.ਅਰਵਿੰਦ, ਸ.ਹਰਜੀਤ ਸਿੰਘ, ਪ੍ਰਧਾਨ, ਸਰਬ ਅਕਾਲ ਸੋਸਾਇਟੀ , ਕੈਲਗਰੀ ਕੈਨੇਡਾ ਸਮੇਤ ਸ.ਰਣਜੀਤ ਸਿੰਘ, ਪ੍ਰਧਾਨ ਸੈਮਸ ਇੰਡੀਆ, ਸ.ਮਨਪ੍ਰੀਤ ਸਿੰਘ, ਡਾ. ਰਮਨਦੀਪ ਕੌਰ, ਡਾ. ਸੁਧੀਰ ਸ਼ਰਮਾ, ਹਰਪ੍ਰੀਤ ਸਿੰਘ, ਸਰਬ ਅਕਾਲ ਮਿਊਜ਼ਿਕ ਸੋਸਾਇਟੀ ਦੇ ਸਮੂਹ ਅਹੁਦੇਦਾਰਾਂ ਦਾ ਫੁੱਲਾਂ ਦੇ ਗੁਲਦਸਤੇ ਨਾਲ ਸਵਾਗਤ ਕੀਤਾ ਗਿਆ।
ਉੱਘੇ ਕਥਕ ਕਲਾਕਾਰ, ਗੌਰੀ ਦਿਵਾਕਰ, ਬਿਸਮਿੱਲਾ ਖਾਨ ਯੁਵਾ ਪੁਰਸਕਾਰ ਜੇਤੂ, ਦੀ ਪੇਸ਼ਕਾਰੀ ਸਫਲ ਹੋ ਨਿਬੜੀ।
ਲਖਨਊ ਘਰਾਣੇ ਦੀ ਕੱਥਕ ਕਲਾਕਾਰ ਹੋਣ ਦੇ ਨਾਤੇ ਉਹ ਪਦਮ ਵਿਭੂਸ਼ਣ ਪੀਡੀ. ਬਿਰਜੂ ਮਹਾਰਾਜ ਜੀ ਨੂੰ ਸ਼ਰਧਾਂਜਲੀ ਦੇਣ ਲਈ ਇੱਕ ਢੁਕਵੀਂ ਕਲਾਕਾਰ ਸੀ। ਉਸ ਦੇ ਸ਼ਾਨਦਾਰ ਪ੍ਰਦਰਸ਼ਨ ਨੂੰ ਦੇਖ ਕੇ ਵਿਭਾਗ ਦੇ ਵਿਦਿਆਰਥੀ ਨ੍ਰਿਤ ਅਤੇ ਸੱਭਿਆਚਾਰ ਦੇ ਖੇਤਰ ਨੂੰ ਆਪਣਾ ਜੀਵਨ ਸਮਰਪਿਤ ਕਰਨ ਲਈ ਬਹੁਤ ਪ੍ਰੇਰਿਤ ਹੋਏ।
ਗੌਰੀ ਦਿਵਾਕਰ ਨੇ ਗੁਰੂਵੇ ਨਮਹ ਨਾਲ ਆਪਣੇ ਪ੍ਰਦਰਸ਼ਨ ਦੀ ਸ਼ੁਰੂਆਤ ਕੀਤੀ। ਇਸ ਤੋਂ ਬਾਅਦ ਤਕਨੀਕੀ ਹਿੱਸੇ ਵਿੱਚ ਠਾਟ, ਆਮਦ, ਪਰਾਨ ਆਮਦ, ਨਟਵਾਰੀ, ਤੇਜ਼ ਆਮਦ, ਥੇਹੀਆਂ, ਟੁਕੜਾ, ਪ੍ਰੇਮਲੂ, ਪਰਾਨ ਦੇ ਨਾਲ ਤੀਨਤਾਲ ਆਇਆ। ਉਸਨੇ ਕਥਕ ਦੀਆਂ ਖੂਬਸੂਰਤ ਪੇਚੀਦਗੀਆਂ ਦਾ ਪ੍ਰਦਰਸ਼ਨ ਕੀਤਾ ਜਿਸ ਨੇ ਸਰੋਤਿਆਂ ਨੂੰ ਮੰਤਰਮੁਗਧ ਕਰ ਦਿੱਤਾ। ਅਭਿਨਯਾ ‘ਤੇ ਉਸ ਦੀ ਕਮਾਂਡ ਦੀ ਦਰਸ਼ਕਾਂ ਦੁਆਰਾ ਪੂਰੀ ਤਰ੍ਹਾਂ ਪ੍ਰਸ਼ੰਸਾ ਕੀਤੀ ਗਈ ਜਦੋਂ ਉਸਨੇ ਠੁਮਰੀ “ਸਬ ਬਨ ਧਨ ਆਈ ਸ਼ਿਆਮ ਪਿਆਰੀ ਰੀ” ਪੇਸ਼ ਕੀਤੀ ਜੋ ਕਿ ਰਸ ਨਾਲ ਭਰਪੂਰ ਸੀ। ਤਬਲਾ ਕਲਾਕਾਰ ਮੋਹਿਤ ਗੰਗਾਨੀ ਅਤੇ ਪਖਾਵਾਜ਼ ਕਲਾਕਾਰ ਅਸ਼ੀਸ਼ ਗੰਗਾਨੀ ਨਾਲ ਉਸ ਦੀ ਪੇਸ਼ਕਾਰੀ ਦੀ ਇਹ ਸ਼ਾਨਦਾਰ ਜੁਗਲਬੰਦੀ ਸੀ, ਜਿਸ ਨੇ ਸਰੋਤਿਆਂ ਦੀ ਵਾਹ-ਵਾਹ ਖੱਟੀ।
ਪੰਜਾਬੀ ਯੂਨੀਵਰਸਿਟੀ ਵੱਲੋਂ ਪ੍ਰੋ.ਡਾ.ਬੀ.ਐਸ.ਸੰਧੂ ਨੇ ਸਾਰੇ ਕਲਾਕਾਰਾਂ ਨੂੰ ਸਨਮਾਨਿਤ ਕੀਤਾ ਅਤੇ ਗੌਰੀ ਦਿਵਾਕਰ ਅਤੇ ਉਨ੍ਹਾਂ ਦੇ ਨਾਲ ਆਏ ਕਲਾਕਾਰਾਂ, ਤਬਲੇ ‘ਤੇ ਮੋਹਿਤ ਗੰਗਾਨੀ, ਪਖਾਵਾਜ਼ ‘ਤੇ ਅਸ਼ੀਸ਼ ਗੰਗਾਨੀ ਅਤੇ ਵੋਕਲ ਸਪੋਰਟ ‘ਤੇ ਫਰਾਜ਼ ਅਹਿਮਦ ਦੀ ਸ਼ਾਨਦਾਰ ਪੇਸ਼ਕਾਰੀ ਦੀ ਸ਼ਲਾਘਾ ਕੀਤੀ। ਅਧਿਆਪਨ ਸਟਾਫ਼ ਡਾ ਸਿੰਮੀ, ਸ਼੍ਰੀਮਤੀ ਵਿਦਿਆ ਗੌਰੀ, ਅਰਸ਼ਦੀਪ ਕੌਰ ਅਤੇ ਵਿਭਾਗ ਦੇ ਤਬਲਾ ਇੰਸਟ੍ਰਕਟਰ ਪੰਡਿਤ ਮਧੁਰੇਸ਼ ਭੱਟ, ਤਕਨੀਕੀ ਸਟਾਫ ਡਾ. ਦਿਨੇਸ਼ ਰਹੇਜਾ, ਬਲਕਰਨ ਸਿੰਘ, .ਅਰੁਣ ਕੁਮਾਰ, ਡਾ. ਮੁਜਤਬਾ ਹੁਸੈਨ ਨੇ ਇਸ ਪ੍ਰੋਗਰਾਮ ਦੀ ਸਫਲਤਾ ਲਈ ਇੱਕ ਟੀਮ ਵਜੋਂ ਕੰਮ ਕੀਤਾ।