ਰਣਬੀਰ ਤੇ ਆਲੀਆ ਨੇ ਆਪਣੀ ਧੀ ਰਾਹਾ ਦੀ ਪਹਿਲੀ ਝਲਕ ਦਿਖਾਈ

ਬੌਲੀਵੁੱਡ ਅਦਾਕਾਰ ਜੋੜੇ ਰਣਬੀਰ ਕਪੂਰ ਅਤੇ ਆਲੀਆ ਭੱਟ ਨੇ ਅੱਜ ਕ੍ਰਿਸਮਸ ਮੌਕੇ ਆਪਣੇ ਪ੍ਰਸ਼ੰਸਕਾਂ ਨੂੰ ਇਕ ਪਿਆਰਾ ਤੋਹਫਾ ਦਿੱਤਾ ਹੈ। ਅੱਜ ਉਨ੍ਹਾਂ ਆਪਣੀ ਧੀ ਰਾਹਾ ਕਪੂਰ ਦੀ ਪਹਿਲੀ ਝਲਕ ਆਪਣੇ ਪ੍ਰਸ਼ੰਸਕਾਂ ਨੂੰ ਦਿਖਾਈ ਹੈ। ਇਹ ਪਰਿਵਾਰ ਕ੍ਰਿਸਮਸ ਬ੍ਰੰਚ ਲਈ ਇਕੱਠਾ ਹੋਇਆ ਅਤੇ ਆਲੀਆ ਤੇ ਰਣਬੀਰ ਨੇ ਰਾਹਾ ਨਾਲ ਕਈ ਤਸਵੀਰਾਂ ਖਿਚਵਾਈਆਂ। ਇਸ ਮੌਕੇ ਰਾਹਾ ਜਿੱਥੇ ਆਪਣੀ ਮਾਂ ਆਲੀਆ ਵਰਗੀ ਦਿਖ ਰਹੀ ਸੀ ਉੱੱਥੇ ਹੀ ਪਿਆਰੀਆਂ ਨੀਲੀਆਂ ਅੱਖਾਂ ਨਾਲ ਉਹ ਆਪਣੇ ਦਾਦਾ ਅਤੇ ਮਰਹੂਮ ਅਦਾਕਾਰ ਰਿਸ਼ੀ ਕਪੂਰ ਵਰਗੀ ਲੱਗ ਰਹੀ ਸੀ। ਰਾਹਾ ਨੇ ਸਫੈਦ ਰੰਗ ਦਾ ਕ੍ਰਿਸਮਸ ਸਵੈਟਰ ਅਤੇ ਪੇਸਟਲ ਗੁਲਾਬੀ ਰੰਗ ਦੀ ਸਕਰਟ ਪਹਿਨੀ ਹੋਈ ਸੀ। ਉਸ ਦੇ ਵਾਲ ਦੋ ਛੋਟੀਆਂ ਪੋਨੀਟੇਲਾਂ ਵਿੱਚ ਬੰਨ੍ਹੇ ਹੋਏ ਸਨ। ਇਸ ਮੌਕੇ ਰਣਬੀਰ ਨੇ ਬਲੈਕ ਟੀ-ਸ਼ਰਟ, ਮੈਚਿੰਗ ਪੈਂਟ ਅਤੇ ਬਲੈਕ ਡੈਨਿਮ ਜੈਕੇਟ ਪਹਿਨੀ ਹੋਈ ਸੀ, ਜਦਕਿ ਆਲੀਆ ਫੁੱਲਦਾਰ ਲਾਲ ਅਤੇ ਕਾਲੀ ਸ਼ਾਰਟ ਡਰੈੱਸ ’ਚ ਖੂਬ ਫੱਬ ਰਹੀ ਸੀ। ਉਸ ਨੇ ਲਾਲ ਰੰਗ ਦੀ ਉੱਚੀ ਅੱਡੀ ਵਾਲੀ ਹੀਲ ਅਤੇ ਕ੍ਰਿਸਮਸ ਹੇਅਰਬੈਂਡ ਲਾਇਆ ਹੋਇਆ ਸੀ। ਰਾਹਾ ਦਾ ਜਿਵੇਂ ਹੀ ਵੀਡੀਓ ਵਾਇਰਲ ਹੋਇਆ ਤਾਂ ਪ੍ਰਸ਼ੰਸਕਾਂ ਨੇ ਉਸ ਨੂੰ ਖੂਬ ਸਾਰਾ ਪਿਆਰ ਦਿੱਤਾ। ਇਕ ਨੇ ਲਿਖਿਆ, ‘‘ਨੈਣ ਨਕਸ਼ਾਂ ਵਿੱਚ ਸੰਪੂਰਨ ਕਪੂਰ ਪਰਿਵਾਰ।’’ ਦੂਜੇ ਨੇ ਲਿਖਿਆ, ‘‘ਖਾਨਦਾਨੀ ਨੀਲੀਆਂ ਅੱਖਾਂ।’’ ਇੱਕ ਹੋਰ ਨੇ ਕਿਹਾ, ‘‘ਆਪਣੇ ਦਾਦਾ ਜੀ ਵਰਗੀ ਲੱਗਦੀ ਹੈ।’’ ਜ਼ਿਕਰਯੋਗ ਹੈ ਕਿ ਆਲੀਆ ਅਤੇ ਰਣਬੀਰ ਦਾ ਵਿਆਹ 14 ਅਪਰੈਲ 2022 ਨੂੰ ਮੁੰਬਈ ਸਥਿਤ ਉਨ੍ਹਾਂ ਦੇ ਘਰ ਵਿੱਚ ਹਿੰਦੂ ਰਸਮਾਂ ਨਾਲ ਹੋਇਆ ਸੀ ਅਤੇ ਨਵੰਬਰ 2022 ਵਿੱਚ ਉਨ੍ਹਾਂ ਦੇ ਘਰ ਬੇਟੀ ਰਾਹਾ ਨੇ ਜਨਮ ਲਿਆ ਸੀ।