ਗੁਰੂਗ੍ਰਾਮ ’ਚ ਭੀੜ ਨੇ ਇਮਾਮ ਦੀ ਕੀਤੀ ਹੱਤਿਆ

ਗੁਰੂਗ੍ਰਾਮ, 2 ਅਗਸਤ (ਪ੍ਰੈਸ ਕੀ ਤਾਕਤ ਬਿਊਰੋ) : ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੀ ਬ੍ਰਜ ਮੰਡਲ ਯਾਤਰਾ ਦੌਰਾਨ ਹੋਈ ਹਿੰਸਾ ’ਚ ਦੱਖਣੀ ਹਰਿਆਣਾ ਝੁਲਸ ਗਿਆ। ਸਥਿਤੀ ਨੂੰ ਕੰਟਰੋਲ ਕਰਨ ਲਈ 6 ਜ਼ਿਲ੍ਹਿਆਂ ’ਚ ਧਾਰਾ 144 ਲਾਗੂ ਕਰਨੀ ਪਈ। ਗੁਰੂਗ੍ਰਾਮ ’ਚ ਭੜਕੀ ਫਿਰਕੂ ਹਿੰਸਾ ’ਚ ਬੀਤੀ ਰਾਤ ਇਕ ਮਸਜਿਦ ਦੇ ਇਮਾਮ ਦੀ ਹੱਤਿਆ ਕਰ ਦਿੱਤੀ ਗਈ।  ਗੁਰੂਗ੍ਰਾਮ ਦੇ ਹੀ ਸੈਕਟਰ 70-ਏ ਦੇ ਗੋਦਾਮ ’ਚ ਦੰਗਾਕਾਰੀਆਂ ਨੇ ਅੱਗ ਲਾ ਦਿੱਤੀ ਅਤੇ ਵੱਡੀ ਗਿਣਤੀ ’ਚ ਕਾਰਾਂ ਵੀ ਫੂਕੀਆਂ। ਗੁਰੂਗ੍ਰਾਮ ਦੇ ਹੀ ਸੈਕਟਰ 70-ਏ ਦੇ ਗੋਦਾਮ ’ਚ ਦੰਗਾਕਾਰੀਆਂ ਨੇ ਅੱਗ ਲਾ ਦਿੱਤੀ ਅਤੇ ਵੱਡੀ ਗਿਣਤੀ ’ਚ ਕਾਰਾਂ ਵੀ ਫੂਕੀਆਂ।ਮੰਗਲਵਾਰ ਸਵੇਰੇ ਨੂਹ ਜ਼ਿਲ੍ਹੇ ’ਚ ਕਰਫਿਊ ਲਾ ਦਿੱਤਾ ਗਿਆ।ਨੂਹ ਦੇ ਖੇੜਲਾ ਮੋੜ ’ਤੇ ਭੀੜ ਵੱਲੋਂ ਵਿਸ਼ਵ ਹਿੰਦੂ ਪ੍ਰੀਸ਼ਦ ਦੇ ਜਲੂਸ ਨੂੰ ਨਿਸ਼ਾਨਾ ਬਣਾਉਣ, ਗੋਲ਼ੀਬਾਰੀ ਕਰਨ, ਪਥਰਾਅ ਕਰਨ ਅਤੇ ਕਾਰਾਂ ਨੂੰ ਅੱਗ ਲਾਉਣ ਤੋਂ ਕੁਝ ਘੰਟਿਆਂ ਬਾਅਦ ਦੰਗਾਕਾਰੀਆਂ ਨੇ ਗੁਰੂਗ੍ਰਾਮ ਦੇ ਸੋਹੰਦੜਾ ਸ਼ਹਿਰ ’ਚ ਵਾਹਨਾਂ ਅਤੇ ਦੁਕਾਨਾਂ ਨੂੰ ਸਾੜ ਦਿੱਤਾ। ਸੋਮਵਾਰ ਰਾਤ 9 ਵਜੇ ਤੱਕ ਪੁਲਸ ਨੇ ਸੋਹੰਦੜਾ ਦੀ ਭੀੜ ਨੂੰ ਤਿੱਤਰ-ਬਿੱਤਰ ਕਰ ਦਿੱਤਾ, ਜਿਸ ਕਾਰਨ ਉੱਥੇ ਕਿਸੇ ਤਰ੍ਹਾਂ ਦਾ ਜਾਨੀ ਨੁਕਸਾਨ ਨਹੀਂ ਹੋਇਆ ਪਰ ਗੁਰੂਗ੍ਰਾਮ ’ਚ ਅੱਧੀ ਰਾਤ ਤੋਂ ਬਾਅਦ ਦੂਜੇ ਧੜੇ ਨੇ ਨਿਰਮਾਣ ਅਧੀਨ ਅੰਜੁਮਨ ਮਸਜਿਦ ’ਚ ਅੱਗ ਲਾ ਦਿੱਤੀ। ਭੀੜ ਵੱਲੋਂ ਕੀਤੀ ਗਈ ਗੋਲ਼ੀਬਾਰੀ ’ਚ 26 ਸਾਲਾ ਨਾਇਬ ਇਮਾਮ ਸਾਦ ਅਤੇ ਇਕ ਹੋਰ ਵਿਅਕਤੀ ਜ਼ਖ਼ਮੀ ਹੋ ਗਿਆ। ਬਿਹਾਰ ਦੇ ਰਹਿਣ ਵਾਲੇ ਇਮਾਮ ਦੀ ਹਸਪਤਾਲ ’ਚ ਮੌਤ ਹੋ ਗਈ। ਮਸਜਿਦ ’ਤੇ ਹਮਲੇ ਦੇ ਸਿਲਸਿਲੇ ’ਚ 5 ਲੋਕਾਂ ਨੂੰ ਹਿਰਾਸਤ ’ਚ ਲਿਆ ਗਿਆ ਹੈ।ਸੋਮਵਾਰ ਨੂੰ ਨੂਹ ਅਤੇ ਫਰੀਦਾਬਾਦ ’ਚ ਬੁੱਧਵਾਰ ਤੱਕ ਮੋਬਾਇਲ ਇੰਟਰਨੈੱਟ ਸੇਵਾਵਾਂ ਰੱਦ ਕਰ ਦਿੱਤੀਆਂ ਗਈਆਂ। ਆਸ-ਪਾਸ ਦੇ ਜ਼ਿਲ੍ਹਿਆਂ ’ਚ ਮਨਾਹੀ ਦੇ ਹੁਕਮ ਲਾਗੂ ਕਰ ਦਿੱਤੇ ਗਏ।