13 ਭਾਰਤੀ ਬੈਂਕਾਂ ਨੂੰ 4 ਕਰੋੜ ਪੌਂਡ ਦਾ ਨੁਕਸਾਨ

ਲੰਡਨ – ਵਿਜੇ ਮਾਲਿਆ ਦੀ ‘ਫੋਰਸ ਇੰਡੀਆ’ਦੀ ਬੇਲੋੜੀ ਵਿਕਰੀ ਪ੍ਰਕਿਰਿਆ ਕਾਰਨ 13 ਭਾਰਤੀ ਬੈਂਕਾਂ ਦੇ ਗੱਠਜੋੜ ਨੂੰ 4 ਕਰੋੜ ਪੌਂਡ ਦਾ ਨੁਕਸਾਨ ਹੋਇਆ ਹੈ। ਭਗੌੜੇ ਭਾਰਤੀ ਕਾਰੋਬਾਰੀ ਦੀ ਫਾਰਮੂਲਾ ਵਨ ਰੇਸਿੰਗ ਟੀਮ ਨੂੰ ਹਾਸਲ ਕਰਨ ਦੀ ਕੋਸ਼ਿਸ਼ ਵਿਚ ਲੱਗੇ 2 ਬੋਲੀਦਾਤਿਆਂ ਵਿਚੋਂ ਇਕ ਨੇ ਇਹ ਦੋਸ਼ ਲਾਇਆ ਹੈ। ਰੂਸ ਦੇ ਇਕ ਖਾਦ ਗਰੁੱਪ ਉਰਾਲਕੇਲੀ ਨੇ ਕਿਹਾ ਹੈ ਕਿ ਕੰਪਨੀ ਲਈ ਉਸ ਦੀ ਸਭ ਤੋਂ ਉਚੀ ਬੋਲੀ ਨੂੰ ਬੇਧਿਆਨ ਕਰ ਕੇ ਪ੍ਰਸ਼ਾਸਨ ਨੇ ਵਾਧੂ ਪੈਸੇ ਹਾਸਲ ਕਰਨ ਦਾ ਮੌਕਾ ਗੁਆ ਦਿੱਤਾ ਹੈ।
ਇਹ ਵਾਧੂ ਰਕਮ ਫੋਰਸ ਇੰਡੀਆ ਦੇ ਸ਼ੇਅਰ ਹੋਲਡਰਾਂ ਨੂੰ ਮਿਲਣੀ ਸੀ। ਕੰਪਨੀ ਨੇ ਪ੍ਰਸ਼ਾਸਨ ਦੀ ਐੱਫ. ਆਰ. ਪੀ. ਐਡਵਾਈਜ਼ਰੀ ਵਿਰੁੱਧ ਲੰਡਨ ਦੀ ਹਾਈ ਕੋਰਟ ਦਾ ਦਰਵਾਜ਼ਾ ਖੜਕਾਇਆ ਹੈ। ਕੰਪਨੀ ਨੇ ਬੋਲੀ ਪ੍ਰਕਿਰਿਆ ਵਿਚ ਪਹਿਲਾਂ ਤੋਂ ਲਾਏ ਗਏ ਅਨੁਮਾਨਾਂ ਅਤੇ ਬੇਲੋੜੇ ਰਵੱਈਏ ਦਾ ਦੋਸ਼ ਲਾਉਂਦਿਆਂ ਕਈ ਕਰੋੜ ਡਾਲਰ ਦੇ ਨੁਕਸਾਨ ਦਾ ਦਾਅਵਾ ਕਰਦਿਆਂ ਕਾਨੂੰਨੀ ਕਾਰਵਾਈ ਸ਼ੁਰੂ ਕੀਤੀ ਹੈ। ਪ੍ਰਸ਼ਾਸਨ ਨੇ ਜ਼ੋਰ ਦੇ ਕੇ ਕਿਹਾ ਹੈ ਕਿ ਬੋਲੀ ਪ੍ਰਕਿਰਿਆ ਵਿਚ ਨਿਰਪੱਖਤਾ ਅਤੇ ਪਾਰਦਰਸ਼ਤਾ ਵਰਤੀ ਗਈ। ਬੋਲੀ ਪ੍ਰਕਿਰਿਆ ਦੇ ਪੂਰਾ ਹੋਣ ਪਿੱਛੋਂ ‘ਫੋਰਸ ਇੰਡੀਆ’ ਦਾ ਅਧਿਕਾਰ ਰੇਸਿੰਗ ਪੁਆਇੰਟ ਕੰਸਟੋਰੀਅਮ ਨੂੰ ਮਿਲ ਗਿਆ। ਇਸ ਗਰੁੱਪ ਦੀ ਅਗਵਾਈ ਕੈਨੇਡਾ ਦੇ ਅਰਬਪਤੀ ਲਾਰੈਂਸ ਸਟਰਾਲ ਵਲੋਂ ਕੀਤੀ ਜਾ ਰਹੀ ਹੈ।